........... Bienvenue chez les Ch'tis !

Ché gins
Y n’y croyôte te pu
Heuresemint
Y n’a quek’z’in
Qu’ché des bourriques …
Dins ch’pays des baudets
Ché normal !

Et pis :
Tout fini par vinir
L’queue d’nou kien
Elle est bien venue !
Alors ?
Pourquô pas ti ?

Pour commincher
Avec ché gars d’l’UB :
T’as pris forme din leu tiète
Et pis, y’a fallu treuver ché sous,
Y’n’in fallo gramin
Car t’es quéqu’un ti !
Te fais pas din l’demie mesure
Si j’peux m’permette !

Après ché ch’bricoleu (excuses)
Qu’y’a œuvré.
Y’est fort ch’t’homme !
Y’n’a passé des’heures !
Y’a fait tout quô qui faut 
Pour qu'in parle’d’ti.
Et …à m’n’avis, y’a réussi

Et pis ch’grand jour
Y’est arrivé,
Ti aussi.
In étot à cran.
In n’a pas fait s’nenne
Y fallot mette t’kémiche

Ché gins y sont arrivés
Y’n’avot gramin
Che l’pleufe
Elle est arrivée aussi
Y’n’avot gramin aussi
In étot tout frèque

Douchmint mais sur'mint
T’as traversé ch’villache.
Cré vin non
T’étos fier
Et ché gamins !
Y fallot voir
Comme y’t’ravisote !
Y pleuvot 
mais dins leurs z’y
Ch’solèle y brillot !

après in a bien mingé
ch’tit jeune y’in conno in rayon
jusqu’à l’dernière minute
in l’a inbêté.
comme ti, y’éto à la hauteur.

T’es biau
Te vas ratisser larche.
T’es biau,
In va pas t’laisser
Dins ch’courti
T’es biau
In va essayer
D’t’ouvrir ch’garache.

retour au début

JEHAN repart en croisade …

Nouvelle croisade de JEHAN …
Ch’cô y dort incore !
Ch’est avant ché glennes,
Que ch’matin Jehan y’a ouvert s’n’eule.
D’ puis gramin d’ nuits
Y’a du ma à trouver sin sommèle,
D’puis gramin d’ nuits
Y’a du ma à dormir su ses deux orèles.
Ch’est pas enne histoire à dormir debout
Et pourtant …
Quand on est un géant …

Y n’a un qu’y’a mis l’dôgt
Sur enne c’est quô
Qui fait vriller sin nez !
Y’s’fait un peu d’mourron …
Pas vexé, mais un peu touché
Dins s’n’honneur de chevalier,
Dins sin cœur d’Croisé,
Y’ a décidé, à tartous, d’montrer
Qu’dins sin villache in a l’esprit d’clocher.
Qu’dins sin villache in est plein d’vitalité !
Y n’a un … ou hun ?
Que barbare chti là !
Qui veut li supprimer sin jour d’sortie
Qui veut supprimer de l’Pint’côte e’l ‘lundi,
D’nou gins gacher tout l’plaiji !

Aliboron, dort su ses deux orèles,
Jehan, li, y tind s’n’orèle,
D’ché potins d’villache y’est à l’écoute
Mais aussi d’ché sousan tendus*.
Là, y n’in peut pu !
Sin copain y va réveiller
A sin copain y va in parler …
Y’a bien vu qu’ses gars d’l’UB,
Ch’est pas des bricoleux cheux-là,
Y’a bien vu qu’ses gars d’l’UB
D’puis lomint déjà y s’battotent.
Fiers d’leu traditions,
Y z’y allotent avec détermination
Ou d’Estaires animations !
Pas à coups d’épées dins l’iau !
Mais à coups d’épétitions,
Et aussi d’répétitions !

Sin copain y va réveiller
A sin copain y va in parler …
Dis Aliboron et quô qu’t’in pinses ti ?
Et quô qu’t’in pinses d’ché z’imbroules ?
In n’va pas s’rinte malade, non plus braire ! ...
Mais in n’va pas s’laisser faire …
Mais plutôt qu’d’croiser les fers,
Ch’est pu à l’mote,
In va croiser les mots … 
Cha peut piquer aussi !
D’toute façon, l’aute ministre
Y’ n’sort point d’sin bureau,
Ou seul’mint pour parader,
Et s’montrer su des photos.
Quô qui n’n’a à faire
Des traditions d’nou villache ?
En fier chevalier, en courageux Croisé,
J’vas m’battre pour che l’cavalcate exister !

Fiers d’note villache
In va s’montrer à la hauteur.
Fier d’nos gins
In va y mette tout note cœur.
Fiers d’nos pères d’l’UB
In va, défiler plein d’ardeur
Et in va distiller l’bonheur.
In va s’montrer fort !
In est certain qu’les pétits et les grands d’ch’villache,
Qu’les gins de ch’ voisinache,
Tartous, y vont v’nir nous incourager.
Tétus comme des …
Comme des baudets !
In n’va pas s’laicher marcher su les pieds …
Cha s’ra note pied… d’nez !
Et même si y s’en fout,
In n’aura montré partout
Qu’à Estaires, avec ché gars l’UB
In tient à nos traditions.
In n’touche pas à ché momints d’animations.
Cha met du baume dins l’cœur d’ché gins
et par ché temps qui courent, in n’a b’soin !

                                                               (Jean-Luc B.)
* pas de faute d’orthographe … cherchez …

retour au début

Avec eusse tertous,
In n’y prind gramin d’plaiji
In laiche l’ z’imbroules dins l’étape à vaques
In s’amusse bien.
Mais quind qu’y faut ouvrer,
Y faut ouvrer !
In sort d’là tout' ar’quinquer.
Ch'est pas des bricoleux !

Enene fôs l’an
Y’z’ont tartous un rude boulot
Y faut saker d’dins d’tous les côtés,
Y faut saker d’dins comme des ébeulés.
Dins ché majons
Y vont vir ché gins,
Ch'est pas toudis pour un gueul’ton
Mais ch'est souvint un bon momint
Ch'est de l’convivialité
Et … cha rimpli ch’gousset
Ben ouais !
Y’a rien qui ké tout seu !
Ch'est pas des bricoleux !


Et … ché pas un kien qui groule
Qui les z’impêche d’avincher
Ché pas non pu un cadafe tout réchué su ch’mur
Qui les z’impêche d’œuvrer
Comme des durs
Ch'est pas des bricoleux !

retour au début

JEHAN chez les géants ...de la route !

Eh ben, Aliboron…J’n’ai d’jà vu des drôles
D’puis que j’sus arrivé dins tin villache,
Mais che l’fôs chi, ch’est fort !
Ché gins y z’appellent’te cha du sport !

D’habitute, quind j’sors,j’keurs, j’dinse, 
J’argibonne dins tous les sins
Et ché gins y m’ravissent.
Eh ben là …. Ch’est mi qu’y’a ravisé !
J’ai ravisé des drôles de gins déguisés,
Des drôles de gins su des drôles de montures !
Enne cavalcate d’grosses têtes ? cha non !
J’vas plutôt dire … des grosses cuisses !
Des grosses cuisses et des mollets durs !

Eh ben, te vas pas m’croire Ali …
Toute e’l’journée, J’ai ravisé
Toute e’l’journée j’sus resté su plache
Sache comme enne imache,
Enne fière imache d’min villache,
Eh ben… J’sus mate d’les raviser,
J’sus mate d’les raviser pédaler,
J’sus mate d’les raviser avincher su ché pavés :

Et cha roule et cha roule !
D’les raviser j’n’ai plein m’n’eule.
Ciel bas et lourds nuaches,
Ch’p’loton, in dirôt un rouleau compresseur,
Y’avinche à près d’chinquante à l’heure !
Y’avinche su ché pavés d’un autre ache.
Y sont s’coués, y sont s’coués,
Et cha berloque dins tous les sins.

V’là l’aute qui bascule dins ch’fossé,
Sin vélo y fait un solèle
Ch’est pas enne façon d’briller !
Ch’est pourtant enne rude gamelle !
Sitôt fait, sitôt reparait
Et de plus belle, à l’horizon disparaît !
Y’avinche, y’avinche ch’p’loton…
Pas question d’avoir des gampes e d’coton !
Ch’rouleau compresseur y’avale ché pavés,
Rien n’peut li résister !

Ichi, ch’est un aute qui s’rétame
Au biau mitan de ch’pavé
Ch’p’loton y s’ouvre in deux,
In dirôt qui va avaler ch’malheureux.
Cha passe à gauche, cha passe à droite
Ch’est pédaleux, ch’est d’véritapes z’acrobates !
Y n’a qu’un par terre et ch’rouleau y’est passé !

Li ch’est un as d’la p’tite reine,
Et pourtant su l’pavé du côté d’Valenciennes
S’maronne déchiré et dos cassé
Y dôt s’arrêter, cœur fatigué et l’âme en peine,
Bon gré, mal gré, quitter ché pavés … en grès !

Pour li, ch’est pas d’chance, Sin boïau y’a rindu l’âme.
Fatigué, dépité, la mort dins l’âme,
Bras levé avec s’reule crevée y’attind qu’in l’dépanne,
Su l’bas côté, par ché gins intourés, y’est arrêté.
Mécano arrivé, reule kangée… à l’horizon disparaît.

Et ch’premier y’avinche,
D’puis l’pavé d’Mons en Pévèle
D’pédaler, y’s’sint des z’ailes.
Y’écrasse ché pédales … increvape
Y’avinche su ché pavés … imperturbape
In tête y passe au carr’four d’ l’arpe.
Sin nez dins l’guidon, les bras à l’équerre,
S’bouke intr’ouverte, y’bouffe de l’poussière.
Pédaler y faut, ch’est pas l’momint d’ker !
Ché lauriers de l’victoire y veut aller ker.

Roubaix est là … Pavé … de bonnes intentions
Sous ses boïaux la douce caresse,
La douce caresse du vélodrome et de s’piste in béton.
Su sin visache, la douce caresse,
La douce caresse de l’arrivée et la bise pour le champion !
A lui la bise sur le pavé ! A lui le haut du pavé !

Et cha roule et cha roule !
D’les raviser j’n’ai plein m’n’eule.
Ciel bleu et blancs nuaches
Tiens ! y’a pas tourné l’page ! …
Re v’là l’aute sorti d’sin fossé,
Ses leunettes y’a r’tiré
Ch’est pour mieux raviser …
Ch’est pour mieux déguster !
Illuminent ses deux z’yeux clairs
un visage au masque de poussière
Ch’est enne façon d’briller !
Il l’a terminé ! pour li aussi ch’est l’bonheur !
Ch’étot pourtant enne rude gamelle !
Ch’est enne façon comme enne autre d’sortir vainqueur.
Mais… y’a pu gramin de spectateurs.

Y’avinche, y’avinche ch’garchon,
Y’avinche avec ses gampes e’d’coton.
Sin vélo y’avale che l’piste in béton.
Ch’est enne douce caresse
P’t’être qu’un jour li aussi s’ra champion…
Aujourd’hui, y’en a bavé mais y’est pas resté su ch’pavé !
Paris Roubaix n’li a pas résisté !
Te vôs Ali, j’ai passé un rude bon momint !
ché z’hommes d’Paris Roubaix , ch’est des géints !

                                                                (Jean-Luc B.)

retour au début